爆奶記

筆者都好耐冇飲過牛奶喇，難得見倒雪櫃有兩盒，咁就緊係唔執輸拎返一盒黎飲。其實以前細個果陣都成日會飲牛奶，但係都唔會覺得打開個盒係咁麻煩嘅事。好日唔飲，一飲就出事喇，個盒鬼死咁難開，搣極都搣唔倒個嘴出黎，搞到筆者把幾火，大大力咁搣個盒，點知就係因為咁唔小心倒到D奶周地係，成盒奶就係咁樣冇左一半，個嘴仲俾我搣到爛曬。(唉，我都係粗暴左少少姐，鬼叫你咁難開咩/  \)

個嘴俾我搣到又爛又梅/ \

咁筆者炆炆地就緊係即刻上網揾下係邊條友仔發明埋D咁嘅爛鬼包裝，咁鬼死麻煩(怒)。上維基一睇，原來呢種包裝叫「利樂包」，大陸叫「屋頂包」，又叫新鮮屋，上面仲寫話呢種包法係一種由6層紙板構成嘅複合紙塑包裝，即係保鮮內層、紙基層、阻絕層、保鮮中層、阻氧層和保鮮外層，而且據說呢種包裝仲可以保持牛奶嘅鮮味(係真唔係丫？)。筆者理得佢咩層丫，淨係知道拿拿臨搵出邊條友仔咁得閒發明埋D咁嘅野。拉下少少個網頁(哈，仲唔俾我搵倒你！)，原來發明呢個利樂包嘅係一個美國人，叫做John Van Wormer嘅玩具廠老闆，佢係起1915年發明呢個包裝嘅(John哥哥，你整玩具好啦，做乜咁得閒搵D咁嘅野黎搞丫/  \)，而呢種包裝起1933年就開始比人廣泛應用，成為左最常用嘅奶類飲品包裝。(註)

不過筆者有少少唔明，其實呢種包裝都用左咁耐啦，點解冇比其他包裝取代，又或者搵人走去改良下佢嘅呢？唔通大家都唔覺得佢好難開-口-?我就真係唔覺得佢有咩咁好喇，宜家我成日都好懷疑會唔會唔覺唔覺咁飲埋D紙碎落肚(我多疑？)唉，真係希望有人可以解答下我呢個問題/  \

PS：John哥哥我仲未嬲完架，快D賠返半盒奶俾我T^T(搵人同我一齊鬧爆佢\"/



(註)
第二段資料參考自維基百科：http://zh.wikipedia.org/wiki/%E5%B1%8B%E9%A0%82%E5%8C%85