出前一丁個FD －－ 男前一丁

筆者最近好鍾意起D零食店度流連，前日就起紅磡國際都會廣場入面一間零食店見倒一款個樣衰衰格格嘅零食

一開頭遠睇仲以為係出前一丁出左咩迷你版，拎上手睇先知原來中左伏。呢包(?)野叫男前一丁，蓋面包裝上面果隻公仔一睇就覺得佢衰格，仲有一陣「佬」味，加埋個名……成個感覺真係好……「麻甩」……。每次見倒D咁樣衰嘅野，筆者都會忍唔住將佢地買返屋企，呢個點睇都走唔甩喇掛。

返到屋企，已經忍唔住要拆開佢，睇下入面係D咩。一打開，即刻有一陣好濃烈嘅男人味由杯內擴散出黎……就假嘅。打開左個杯蓋，入面有包野，拎出黎睇睇，橫睇掂睇都似係包老鼠藥。

見倒咁，筆者就梗係即刻淆底唔敢食啦。拿拿臨睇下個包裝上面寫D咩「名稱：清涼果子     原材料名：&%#糖 、$&粉、水飴、香料、著色料(紅黃花、&@$!&$)……」(符號代表一堆我睇唔明嘅日文)。算喇，反正睇黎睇去都睇唔明，見倒入面寫住「糖」、「粉」、「水」呢D字眼應該都食唔死人掛。死就死，筆者沉住氣，好MAN咁將一整包老鼠藥倒曬落口。第一個感覺係「好甜」，第二個感覺係「很甜」，第三個感覺係「好小學雞FEEL」。估唔到筆者英明一世竟然就俾呢包野嚇親，哈哈.__.

不過包野就真係幾好食，成包倒落口果下感覺甜蜜得黎又不失霸氣。可惜嘅係「剎那嘅光輝唔代表永恆」，口入面嘅甜蜜兩三秒之間就俾冷酷無情嘅口水淹沒。嗚呼哀哉，筆者終於明白蔡楓華當年講緊D乜。