大時大節食豪D：放題

是日講「放題」。「放題」大家聽得多、食得多，對「放題」嘅認識大抵就係任食、刺身、旺角、多人，離唔開呢幾個關鍵字眼。因為可以任食、因為有刺身，所以尋晚去慶祝友人生日時，決定食豪啲－－食「放題」，因為友人極之鍾愛三文魚刺身。

不過對於「放題」，原來呢個字眼係被香港人誤解左架喎。今日上維基望望，真正代表任食嘅日文唔係「放題」，「食べ放題」（任食）、「飲み放題」（任飲）先至係正解。（熟識日文嘅同學們有錯的話請多多指教:D）原來自己食左咁多次都一直講錯，真係失敬失敬喇。不過始終唔識讀日文，淨係識漢字的話，都係叫番佢做「放題」啦ＸＤ

以前一直光顧旺角樓上店鋪嘅放題，好似青葉、雷門、木村等等，座位都非常擠逼，侍應好似冇位行、客人坐得唔自然、食物點極都唔夠數……幸好相對便宜，點多幾次都總會食飽飲飽。不過今次想試下其他地方嘅放題，於是去左荃灣。

筆者同友人一入到去都覺得裝修唔似平時食開嘅放題，通道好闊、燈光幾猛、唔嘈吵，坐得舒適過以前。點菜時，友人非常高興地點刺身，筆者就揀緊有咩鐵板燒物。

講食材質素，其實每一間放題都類同，刺身大唔大塊、燒物燒得香唔香，大抵都係差唔多。但值得一提嘅係份量：

根據友人食後感想：寫幾多比幾多，唔會點十塊先比得五、六塊，結果又要點多幾次、吹多幾次。而喺友人極力游說兼威脅之下，從來唔食刺身嘅筆者都試左一塊三文魚刺身。唔係唔好食嘅，但筆者唔太喜愛呢種質感，都係火炙三文魚壽司好食，佢好似淋左Ｄ鰻魚汁落去，令壽司味道突出唔少。

除左壽司之外，佢有特別嘅熟食。

日式蒸蛋：雖然筆者討厭食上面嘅菜，不過蒸蛋部分好滑好暖，好食，睇落細細杯但食完都飽。

鴨胸配左一個莫名地辣嘅醬，唔小心點左辣過WASABI :D

不過唔係難食嘅。其他熟食仲有冷麵、烏冬、雞翼、串燒等等，另外仲有鍋物，不過只有兩人的話就冇可能食得哂……

最後食完會送甜品，通常放題都會有甜品提供。今次係「食得到的雪米糍」，平時食嘅雪米糍會凍到結冰，咬唔落。呢個溶左雪食得到，算係咁啦:)

總結一下，以放題黎講，今次呢間算係唔錯架喇，食物質素正常，又有第二度冇得食嘅蒸蛋等等，最重要都係環境坐得舒服，所以筆者同友人都食得算滿意（我諗佢都係呱）。

食任食放題，都只係想開開心心食得多多，所以提供到一個舒適環境，客人坐得好就自然會黎食多幾次架啦。