宜家家居：你去買傢俱，定去買野食？

見到標題會覺得詭異嗎？售賣傢俱嘅店舖理應與食物無關，但宜家家居(IKEA)正因為與食物有關，令唔少明明唔打算買傢俱嘅人專登入去走一趟。呢一點，打中時下年輕人閒日逛街行到疲累又口痕嘅特點，令宜家家居多一筆額外嘅收入。

相信大家去宜家家居，買得最多嘅未必真係傢俱。或者大家會好似我咁，每次去宜家家居都係睇下擺設、坐下沙發休息，然後去到最尾就係買個便宜嘅熱狗套餐食下。

老實講，佢嘅熱狗唔係特別美味，只不過係超抵食，香腸比市面賣嘅較長，醬料自己任唧，仲配埋一杯可以添飲嘅汽水，只係十蚊！（現在可能加價了？）真係不得了，每次去宜家家居都見到後生仔女行夠玩夠就入去買黎食，好似變成宜家家居必買ITEM一樣。（或許你會覺得去傢俱店舖食熱狗很荒謬，但事實上真係唔少人會特登去買。）

大概係熱狗套餐嘅成功，爆谷、新地筒等等小食都吸引唔少人幫襯，去宜家家居變相係去食野多過真係買傢俱。於是宜家家居亦喺某幾間分店提供正餐，就好似一個中途休息站咁，大家睇完大型傢俱之後，食番一碟意粉，再繼續行去睇下小型家品。同熱狗套餐一樣，正餐價錢比起外面食餐飯都要便宜少少，而且菜色都幾多、幾特別。


筆者最鐘意食肉丸，純粹因為佢便宜同好食，而且只要你同餐務員講，佢就會配上意粉或者薯仔，要飽肚的話唔係難事（笑）。另外有為追求健康的人士設計嘅三文魚沙津、冰凍甜蝦、雞翼等等小食，有專為小朋友設計嘅兒童餐，有蛋糕、甜品，有餐包、忌廉湯，各式各樣嘅食物總會有一款合你心水。

而筆者最近去過一次，發現有煙肉香腸卷，兩樣都係筆者十分喜愛嘅食物，味道唔錯的，而且都算大大舊，好入味，大家下次去行都不妨試試:P

因為讀緊廣告科，於是諗到：喺一間至少有兩三層嘅大型傢俱店舖提供食物給顧客，令佢地可以暫時休息坐坐、食下傾下買邊款傢俱，留住佢地耐啲，仲搶埋外面食肆嘅生意，結果多一筆額外收入，嗯，睇怕都係行銷策略果啲野黎架喇……（所以我應該中計了！）不，應該係大家都中計了。（笑）

如果你都有試過去宜家家居食野嘅經驗，或者都黎SHARE下啦:)
（部分照片來源：OPENRICE）