假日東涌CHEAP CHEAP自助餐之旅

是咁的，

話說筆者上一個星期日同友人去左東涌東薈城入面一間叫Essence嘅餐廳食自助餐。

就係呢間喇=3=

呢間野都幾難BOOK位，起碼要早成個星期打去先有位。
其實筆者已經唔係第一次黎呢度食野，

對上一次係一年前嘅事，

除左貪佢平外，當然都係貪佢平啦(XD

加埋一先係200蚊咁上下，香港仲有咩地方夠佢平!

今次再去，感覺間野冇乜點變過。

係個價錢加左少少，宜家係218仲要加一。不過算啦，又唔係加左好多，加幅都係合理嘅。

講下食物質素，佢地嘅水準都冇乜點變，中規中矩啦，以下係筆者推介：

1)港式自助餐，壽司剌身緊係少不了。真心咁講，呢度嘅剌生同壽司種類唔算多，放日式食物嘅位一眼睇曬。除左最常見嘅三文魚外，仲有吞拿魚、八爪魚、油甘魚(唔知有冇記錯?)，總之加埋就係得四款剌生。而壽司方面，果度除左用以上提到嘅四款刺生加上飯同為壽司之外，仲有青瓜卷同埋蟹籽卷，款式真係少之有少，就算加埋青口同龍蝦仔都係少得可憐(二百幾蚊就咪咁多要求啦\"/)。好彩嘅係D魚生都夠新鮮，口感都唔錯，叫做不過不失啦。順帶一提，魚生區係所有人必搶嘅食物之一，一開頭果個零鐘一定人生人海，次次要拎都排成N世先到你，仲要有人打尖！所以建議隔一排先去拎，通常過左一個鐘咁上下就會冇乜人，果時就任你拎=3=

2)之後要講嘅就係意粉，其實果度嘅意粉都唔錯。餐廳埋邊有個位係專整意粉，係即叫即煮的，所以時間會長D。麵方面有菠菜麵、紅蘿蔔麵、同墨汁麵俾你選(睇佢拎D咩出黎)，汁方面就有白汁同茄汁，筆者試左白汁紅蘿蔔意粉同埋白汁菠菜麵，都幾好食，入面有D煙肉同蘑菇，食落去都幾香，個汁就淡淡地，唔會太「傑」，食落唔錯，筆者都想食多幾次，但係意粉都幾「滯」，食完好快就飽，呢點要注意。

3)除左刺身同意粉外，果度嘅甜品都係唔錯嘅選擇。筆者特別推介朱古力泡芙，雖然佢地嘅賣相有D不太討好，講白D就係似一舊舊嘅「狗屎」……但係如果屎都有咁好味咁我又唔介意食嘅.__.話返轉頭，D狗屎外層都幾重朱古力味，而泡芙中間又包住左鬆軟嘅CREAM，雖然筆者唔知果D CREAM用咩造，不過食落口又真係唔錯，所以食左好多.__,另外，其實果度D 蛋糕都唔錯，不過……次次去到都見倒佢地俾人切到爛曬，真係見倒都冇曬胃口，所以呢方面就真係有待改善一下喇。果度仲有一D細細杯嘅甜品，好唔好味就見人見智，當然係總總都唔同啦，筆者友人就覺得唔錯，不過筆者食左杯粉紅色嘅之後就有種「中伏」嘅感覺，所以……哈哈哈哈哈哈哈哈哈哈.__.

九點前人山人海，嘈到拆天

九點後人潮散去，成個感覺舒服返曬=3=

總概黎講，呢間野嘅賣點係平(純粹筆者個人感覺)，所以要求真係唔好太高。環境方面，如果十分滿分筆者只能夠俾5分，算係岩岩合格。因為果度實在係太嘈(D人講野好大聲)冇咩氣氛可言，而且就好似先頭咁講，D食物成日俾人搞到爛曬，又成日有人打尖，有時真係食都食得唔開心。不過呢D都唔係餐廳嘅錯，係人嘅問題，不過始終都好影響形象。而果度嘅侍應都幾有禮貌，食物尚算衛生。最後，筆者對呢間餐廳嘅評價係中規中矩啦，不過價錢都係幾吸引嘅，相信應該都仲有下次:)