再來四個蒸包!

今天，邊界牧羊會繼續講蒸包。
想重溫上星期提到的黑椒叉燒包 、客家蘿蔔包和菜肉包，
請到：同麥兜一齊食包啦！

星期三

南瓜包  ：
圓碌碌的，黃色嘅外皮（麵糰中加入了南瓜肉），
在一眾白色的蒸包中突圍而出，吸引眼球。 
 
個包入面d餡有南瓜肉，
甜甜的，幾好食。

知唔知？
日本南瓜最啱用黎做南瓜包嘅餡料。因為佢甜度適中、質感糯軟。
反而中國同香港嘅南瓜，水份較多，甜度頗高，比較適合用黎煲湯入饌。
參考自：梁偉山：《香港點心》（香港：飲食天地出版，2009），頁15。

星期四
   
榨菜肉絲包：
包以波浪紋圍邊，似一個隆起嘅蟹殼。
入面d餡係豬肉餡混和著一條條的榨菜。
食落口，感覺d餡比一般嘅包結實，
榨菜唔辣，但爽口。

星期五 
 
花卷：
從包的外形，可以知道整包師傅係未蒸個包之前，
將麵糰捲起黎，形成一層一層嘅紋理。
而包嘅外邊，就隨意地灑上一些蔥花作點綴。
起初見到呢個包個名叫花卷果陣，
牧羊覺得好特別，
都唔似平時d包咁叫XX包咁普通。
唔知入面有無餡呢？
於是牧羊就走左去問賣包阿姐，
佢答話有餡架，入面有火腿。
聽落好似唔錯咁，於是牧羊就俾左4蚊阿姐，
拎住一個花卷返屋企啦。
但係…… 

你見到有火腿餡嗎?
其實，係個包嘅右下角，
你會隱若見到一處粉紅色嘅地方，
佢就係火腿，不過，就只係得一半尾指指甲咁大。
原來筆者心中所想嘅餡嘅定義，
係同阿姐心中所想嘅係唔同架。
（突然之間，牧羊有種俾人欺騙了的感覺~~）
雖然係咁，都要提下個包係咩味嘅，
個包味帶鹹香，口感煙韌，都唔差嘅。
不過，筆者未必會再買呢個包啦。

星期六 

奶黃包： 
從外形上看，呢個包比酒樓的奶黃包較大、較扁身。
食落口，質感細緻、鬆軟。
入面d餡好似比酒樓嘅為淺色。
不過，味道又幾好，d餡甜度適中，
滑得黎又有奶香味。
佢同上面幾個包一樣都係4蚊一個。


知唔知？
整包師傅整完蒸包的餡料之後，通常會將d餡料放入雪櫃雪一晚。
因為新鮮的餡料，仲有熱氣，水份多，會影響麵糰，
令到佢糊化，較難包住d餡料，會出現露餡的情況。
相反，餡料經過冷藏，就會變得堅硬，表面乾爽，較易處理。
參考自：梁偉山著：《香港點心》（香港：飲食天地出版，2009），頁21。

如果你買多過2個包，就可以以優惠價5蚊，
購買原價7蚊的豆漿添（樽豆漿係600ml嘅）。

豆漿配搭蒸包，簡簡單單，已經係一份健康營養早餐啦！


不知道大家喜不喜歡吃包呢？有吃過甚麼特別的包嗎？歡迎留言和筆者分享!