情人節精選－－明將壽司

情人節將至，各位諗倒果日去邊度未呢？如果仲未諗倒又想挑戰一下味覺上嘅享受的話，在下有個好介紹。呢個地方，除左可以為你嘅銀包慳返一筆之外，亦可以考驗愛情嘅堅貞，而且店內亦充滿濃厚嘅藝術氣氛。究竟邊間餐廳咁把炮？當然就係傳說中嘅明將壽司！

 所謂不到明將非好漢，身為美食判官的筆者又豈能無動於衷，所以昨晚決定親自出馬，挑戰西九明將。一入門口，發現場內座無虛席，一大堆死士正埋頭苦幹咁將一堆貌似食物嘅藝術品放入去口中，有D邊食邊笑，有D面容扭曲，充滿熱鬧氣氛。好喇，廢話唔再多講，介紹下食物先！

明將其實係一間食物嘅藝術館，入面每位壽司師父都係抽象派大師，佢地有無限嘅創意，可以將兩種或以上全無關連嘅食物合成為一種全新食物，好似炸多春魚壽司、炸魷魚鬚壽司，當然仲有佢地嘅鎮店之寶－－紅豆軍艦壽司。

多春魚壽司

壁虎肉壽司

嘔吐物軍艦

唔知咩壽司

以上食物全部都出自大師之手，佢地最犀利嘅地方就係可以令食物失去原來的樣貌，再改以恐怖嘅形象示人，雖然味道一般，食後亦會隨即有一種中伏的感覺，但足以堪稱抽象派壽司嘅代表之作。




情人節深情推介：


第三位：橡筋1號+橡筋 2號

 橡筋1號與橡筋 2號雖然貌似海蜇軍艦同帶子裙邊軍艦，但係佢地都有如橡筋一樣，堅韌無比，就算出盡九牛二虎之力都難以將佢地咬斷，好比愛情嘅堅貞，成為情人節必點食物！















第二位：紅豆軍艦壽司

紅豆軍艦壽司是明將壽司師父的精心傑作，亦都係各位挑戰明將之死士嘅必點食物。起一舊溫暖嘅飯外面包上一層經歷海枯石爛嘅紫菜，一堆變左色嘅紅豆，食落去有一種青青小草嘅味道。呢一種青澀嘅原始味道，足可讓你尋回那些年初戀的感覺。






第一位：鹹魚孖寶

唔想多講，一試就知有幾勁！食完呢兩舊野依然可以面不改容的乃真漢子也，不過我就做唔倒.....

後感：


如果，你覺得你嘅男朋友或女朋友唔夠愛你，請你起2月14日夜晚帶佢到明將，如果第二日佢都仲係對你不離不棄，請你好好珍惜佢，呢一份感情得來不易。