麥當當：薯條點先最好食？

承接番上星期嘅麥當當環節。今次介紹麥當當美食中嘅美食。由於筆者成日喺麥當當食呢樣果樣，試過唔少「食法」，終於發現有咩係必食，有咩係必定唔可以食。而今次就係講必食部分。

去麥當當，唔食薯條唔通你去食粟米？唔好玩啦。但食薯條，筆者覺得有三個方法係特別好食。除左茄汁，其實都仲有其他配搭架！一開始係用甜酸醬，細個果陣就已經咁食。當時覺得甜甜酸酸咁真係好好食。

但人老左麻煩左，加上無聊就發現白糖加茄汁嘅效果更加好食。雖然味道係甜甜酸酸架喇，不過咬落去一粒粒嘅白糖度，口感就唔同左，而且有時候想食得更甜，就可以落多一包糖，更有說法指咁樣食薯條會冇咁熱氣，於是成為左習慣。

後來推出左SHAKE SHAKE薯條。你以為食紫菜味已經好好食？其實將紫菜同蜜糖味一齊SHAKE，又甜又鹹刺激你味蕾，係我覺得最好食嘅薯條。
（鐘意的話可以放埋麥樂雞一齊SHAKE）

另外，講番薯條本身先係最重要。有時就算堂食，佢本來未賣比你已經放左好耐，咁就一定會變「林」，果陣落咩調味都幫唔到你。咁點算呢？唯有同佢講要「即炸」薯條，或者你唔好意思咁直接，你同員工講要「走鹽」薯條，佢都係要即刻炸比你。咁就可以保證薯條係新鮮炸起脆卜卜喇！
（走鹽其實個味道差唔多，覺得唔咸可以去拎包鹽ＸＤ）

不過佢本身炸三分鐘嘅薯條其實未係最好食！只要炸多半分鐘至一分鐘，會令薯條更乾同脆，咬落去會有聲。可惜要食到呢種炸耐左嘅薯條都幾難，有興趣的話可以試下繁忙時間去叫薯條食，因為人多手腳亂，有時真係會炸到唔記得拎起佢……（又係筆者試過ＸＤ）

ＰＳ：可能你會覺得薯條味道唔同以前。因為轉左一部分係中國薯條，以前全部係外國，味道真係唔同。個人認為外國薯條係好食啲……真可惜。



最後送上一個溫馨提示ＸＤ其實薯條真係少食多滋味，而且本身熱氣，食太多始終對身體唔好。下篇，會係麥當當系列嘅最後一篇，會講有咩食物係千萬千萬唔好食！（我好認真，真係唔建議大家去試ＸＤ）

ＰＳ：講起薯條。上次有位老師提議過蝦膏配薯條（重口味），或者各位可以去挑戰下！（但筆者唔食得蝦，而且淆底ＸＤ）

上期提到：麥當當食物飲品搵你笨
http://hohosix.blogspot.com/2012/02/blog-post_8384.html
未睇過嘅話就記得追番喇！