味吉拉麵館(MIKICHI)

豬肉，大家食就食得多。不過以豬頭公仔做生招牌嘅拉麵店，你地又有冇去過呢？新蒲崗上年開左一個「大型」商場叫MIKIKI，因為改名改得夠奇怪，加上對新商場有啲好奇，於是幾日前去兜左一個圈，而入面就有一間叫做「味吉拉麵館」，有個又紅又大又搶眼嘅豬燈箱，吸引左好鍾意豬嘅我入去試食。

雖然係被佢個招牌公仔吸引左入去，之不過當中嘅拉麵又真係幾好食。拉麵店裡面有各種唔同湯底嘅拉麵，主打係豬骨湯，於是就試左呢款。至於其他湯底，好似有醬油湯、麵豉湯、麻辣湯，睇見餐牌上嘅相都唔錯，不過我只係鍾情於豬骨……

　

雖然賣相比起DISPLAY黎講並唔係特別美觀，看似滿碗都係湯嘅拉麵，食落豬骨湯真係幾好飲。拉麵吸收左湯嘅味道，一邊食一邊飲湯，個人覺得都係唔錯嘅拉麵，之不過我又講唔出佢有特別之處，只係好食。同行嘅池佐島夜香(XD)食果半隻蛋食得好似好開心，相信味道應該都係唔錯。

而右邊幅相唯一嘅豚肉，雖然真係好細件，不過味道比拉麵更值得推薦，有少少甜甜地，又有肥肉，莫名地有入口即溶嘅感覺，我幾鍾意呢舊珍貴嘅豚肉，可惜嘅係得一件唔夠過口癮。（雖然餐牌上面已經寫明只有一件，寫到出面咁樣其實都幾貼心）

除左拉麵，都有叫小食。見佢唔算好貴，加上我又喜愛食雞翼，所以叫左一碟兩串有四隻嘅雞翼串試下啦。燒出黎嘅雞翼真係幾脆卜卜，咬落去啲皮度感覺良好，可惜我係重口味的，略嫌佢唔夠味道，但味道都唔差。

而成間店舖最吸引我嘅其實係紙巾，哈哈。因為個豬頭真係好得意，於是「唔小心」咁拎走左幾張番屋企。順帶一提，連牙簽紙套都係豬公仔呢。另外埋單時候比左張優惠券同埋儲分卡，可以換禮品。既然食物質素都幾好，應該會再去食多一兩次，然後儲分換走啲禮品（笑）。不過價錢方面的確唔平，所以都係少食多滋味啦！