麥當當：食物飲品搵你笨

大家知唔知道，其實食麥當當，貌似價錢好平，推出廿蚊餐鬼咁吸引，不過佢有好多搵笨招數，搞到大家比足錢時食極都唔飽、飲極都唔夠。所以，呢篇網誌就會同大家分享一下個人經驗，令大家可以食得平都食得抵！

PART 1：飲品搵笨

反映現實啊= =

大家飲可樂嘅時候或者都會覺得，點解飲左兩啖就冇哂？原因就係冰塊其實佔左成個杯嘅一半。飲得可樂「走冰」會冇咁好飲，所以你地會同員工講「少冰」，不過我話你知係冇用嘅！實際上「少冰」同「正常」係冇分別，依然係比半杯冰你。所以每次叫完「少冰」之後你要記得搖下個杯，睇下Ｄ冰去到咩水平，太多冰就要同員工換過杯。

「新地樂」即係汽水加雪糕，佢就更加麻煩。因為雪糕沉落汽水度會產生好多泡沫，所以員工通常唔會比你「走冰」，咁你就要話要「超少冰」。唔係講笑，只要有三粒左右嘅冰已經可以阻止雪糕下沉，所以三粒冰可以保障你有大半杯可樂之餘，又唔怕雪糕即溶。




PART 2：雪糕搵笨

有幾可會食到咁大個新地筒啊!!!?

夏日炎炎大家或者會去買杯雪糕食下，而麥當當嘅平價雪糕亦吸引唔少人去幫襯。不過食得多就會覺得點解每次份量都唔一樣？呢種情況以新地筒最為普遍，因為有時唧得唔好，就會流哂入中間，但你又點知佢係唧得唔好、還是偷工減料呢？所以做人要精明！

其實每一款雪糕都係以圈數去計份量，新地筒應該有兩圈半，新地就應該有三圈半，麥旋風就有四圈半。如果發現比人呃秤，記得要求佢整過杯。

另一款雪糕方面嘅問題，係佢有時會好溶，或者唔新鮮。有時候一次過太多人買雪糕，佢地部新地機唔夠奶用、凍唔切，唧出黎嘅雪糕就會好核突，溶到成杯奶昔咁，夏天就真係成日都會咁樣。所以去買雪糕記得要留意佢嘅質素呢。曾經試過買一杯喺雪櫃拎出黎嘅雪糕，已經溶左半，雖然冇變味，不過比得錢就唔應該食呢啲唔知放左幾耐嘅雪糕。

PART 3：薯條搵笨

薯條，大家都鐘意食啊！連老師都話，耐唔耐就會想去買包薯條食下。之不過麥當當嘅薯條，真係可以好呃秤。佢嘅大細，在於整薯條果個人有冇好好心機慢慢去整。有時，你加大包薯條，可能拎番出黎同一包細薯條差唔多。的確，只要有技巧，細薯條都可以扮成大薯條咁拎比客人（因為筆者做過呢件事ＸＤ）咁點算好呢？

如果你見到自己包薯條望落好鬆散，即使個盒好脹，都唔好比佢呃到，請隨即用手去揸落去！會扁的話，就要求換過包大嘅。

另外，外賣果陣被偷工減料嘅機會更高架！所以除左點齊所有食物之外，都要睇下會唔會大薯條變細薯條！


以上都係筆者過去發現（做過）嘅搵笨事，希望咁樣爆料唔會比之前嘅員工打我啦！
下篇（一星期後），將會介紹如何食麥當當薯條先係最好食嘅，希望大家記得留意：Ｄ