清明節特別劇場－－一個食物的故事（上）

今日係一年一度嘅清明節，唔知大家有冇去拜山呢？
筆者今日就因為懶所以冇去(喂，太直接了吧XD
不過唔緊要，筆者係一個傳統嘅中國人，對於祭祖呢樣野，一向都講心唔講金。所以雖然筆者肉體冇去拜，但精神一直都與祖先同遊！(仲狡辯XD

話返轉頭，由於今日係清明節，所以筆者就想起度分享一個同一種食物起源有關嘅祭祀故事。(個故事係尋晚發夢時祖先話我知的)

故事嘅主角仲係聰明到不得了嘅諸葛亮添（呢張相算係最好睇果張架喇。＿。）好，廢話少講，即刻去片！

故事發生起三國時代……

話說有一次，孔明搞掂左孟獲之後，就拉大隊返屋企。當佢地去到瀘水河邊嘅時候，點知一個唔好彩遇上漲水，而且仲水流急促，一唔小心可能會俾水流沖左落大西洋都未定。精明嘅孔明緊係率領佢嘅部下一齊淆底啦(孔明：你當我傻架咩！)就係咁，成隊蜀軍都俾水漲搞到冇曬辨法。

就起佢地「R」爆頭嘅時候，忽然又殺出一條自稱係當地老百姓嘅友仔同佢地講話：「拿，呢條河係咁衰架喇。如果你硬係要過河嘅話，咁就要先祭一祭我地呢度嘅河神大人。如果唔係，就算你俾保護費我都幫你唔倒。」

孔明：「超，濕濕碎啦，你當老子我流架！」

居民：「拿老兄，說話就唔係咁講嘅。我地個河神大人就好嘴饞嘅，元寶蠟燭呢D咁行嘅野就唔洗多講啦。另外仲要黑白二將，即係黑牛同白牛每樣一隻。最後仲要一個元帥，即係人頭一個……」

「嘩！你條友仔丫，咁狼死連老子個人頭都唔放過。」

「哦，我地呢度咁多年都係咁樣祭河神架啦，唔中意咪唔好過囉，果邊有的士。」

「得得得……老子自有分寸，唔洗你勞嘈。」

「#%(*@)(%#%)($^$」

果位老百姓就係咁爆住粗咁走左，留低孔明一個人「戇居居」咁企起度。

孔明心諗：「咁唔掂WOO，咁搞法我仲洗幫先主完成大業？估唔到呢度D百姓野心仲大過阿死鬼曹操。咄！想過條河都咁_煩。老子我咁英俊瀟灑、頭腦精明，人頭點可以話俾就俾。好，就等我諗下計仔搞掂你班友仔先。」

究竟孔明諗倒D咩屎橋呢？而果樣未出場嘅食物又會係乜野呢？欲知後事如何，且看下回分解。