百姓A：「果位就係傳聞中嘅孔明大人喇，又生得幾靚仔WOO。個樣睇落仲有幾分似金城武添，真係好MAN好有型呀！」
「好心你男人老狗就咪起度發姣啦！樣靚冇用嘅，做男人最緊要係抬得拓得。你睇下佢奀挑鬼命，何來男子氣概？何來男人味？同我比簡直差得遠。」百姓B脫去上衣，向在場人士展示佢結實嘅腩肉。
百姓A、C、D、E、F、G(人數太多，之後嘅省略)異口同聲咁大叫：「節省少少啦你！你再唔著返你件衫信唔信我打個「五豐」印起你胸口丫拿！」
百姓R、S、T、U(亦都係人數太多，之後嘅省略)：「咪係囉，你唔抵得人地又靚仔又有腦咋掛！」
眾百姓(除左百姓B)：「孔明孔明我地支持你！(廣東話)孔明孔明我愛你！(普通話)WOO...O...O SHA LA LA LA LA……」
面對住群眾嘅壓力，百姓B見勢色唔對，連衫都未拎就拿拿臨著草走人。孔明見倒自己有一大班支持者，心裡變得好不安，心諗：
「呢班呀叔阿嬸，個個唔係挖緊鼻屎就成身老泥，個樣仲恐怖過生化危機入面D喪屍，真係想見一個殺一個。不過我個死鬼先主教落對百姓要仁慈，有愛心。就等我拿拿臨祭鬼完個河神，過完河返屋企，之後叫月英派一大隊坦克車過黎車死晒你班殘民先得！」
之後孔明慢慢咁行上祭壇，祭壇上有一大堆元寶蠟燭、黑白二將各一，另外仲有一個被紅布包住，貌似係人頭嘅物體。
孔明企起祭壇上面，忽然右手一舉，場內立即奏起李克勤首《紅日》，祭祀儀式馬上展開。場面十分熱鬧，孔明一邊扭動佢嘅BODY，一邊用火點著元寶蠟燭，然後又細細聲咁讀誦祭文：
「喃嘸阿彌佗佛，細佬拎左你要嘅野黎喇，麻煩你收左佢，郵費好貴架。收完之後就麻煩你大人有大量，俾條生路小弟同我班手足行下啦。最多我返到去之後即刻派人幫你搞掂呢班咁樣衰嘅村民，等你唔洗為左避開佢地而住起河底唔敢出黎，阿門。」
唔知係咪河神深深咁被孔明打動倒，當孔明讀完佢篇祭文之後，河水竟然立即退晒！孔明向瀘河點一點頭，表示佢對河神嘅感恩及同情。在場兵將同百姓見倒河水減退，個個都欣喜若狂，不過佢地好快就將視線移向紅布之上，仲露出憂慮嘅表情。
孔明見倒佢地懵下懵下咁嘅樣，就得意洋洋咁轉身起去人頭前面，一手將紅布掀開。原來紅布下面嘅，竟然真係一個人頭！在場嘅老百姓個個都即刻驚到腳都震埋，不過孔明就即刻解釋話：「哈哈哈，大家係咪都俾呢個人頭嚇親呢，呢個真係一個人頭黎架。不過呢個係一個用麵粉造嘅人頭，我幫佢改左個名叫「瞞頭」，係我尋日專程搵人起隔離村間聖安娜打造返黎嘅！我見你地年年祭河神都要用真嘅人頭咁慘，所以就諗出呢個辦法出黎，估唔到呢個河神咁都俾我呃倒。你地以後都跟住我咁做啦，用面粉搓成一個人頭形狀嘅包包，拎黎祭河神，唔洗多謝我架喇。」
就係咁，孔明就成功帶同佢嘅部下渡河返屋企。而「瞞頭」呢個名，後來一傳十，十傳百，就成為左今日嘅「饅頭」喇！
後話：呼~打左咁耐終於打完。其實個故事冇咁長的，不過為左令大家睇得開心，所以筆者起故事入面加盬加醋，希望大家唔好介意>口<
仲有，呢件事係真係假我冇真係去做過考證，不過故事係筆者以前起一本講孔明嘅書籍度睇返黎的，所以我信饅頭真係咁黎架……哈哈
最後，筆者雖然好鍾意呢個關於饅頭嘅故事，不過就好唔鍾意食饅頭，淡到死一D都唔好食。所以如果有一日當筆者魂歸天國嘅時候，大家千祈唔好用饅頭黎拜祭筆者唷^^
沒有留言:
張貼留言